أسباب خروج النادي الافريقي من المشهد الرياضي...

[الصادق ساسي]

اليوم لازم نطرحو بعض النقاط بجدية للنقاش...

النقاط هاذي تناقشنا فيها في مناسبات عديدة

لكن

ديما نرجعو لنقطة البداية ...

علاش في كل مرة نرجعو لتقطة البداية ؟

حسب رايي التعصب والانغلاق والاعتقاد بامتلاك الحقيقة هو السبب...

في الإطار هاذا

أنا اليوم مستعد نبدل رايي ونتبعك

بشرط واحد : تجيبلي حجج مقنعة ...

**************************

النقطة الاولى : شكون واشنية أسباب مشاكل النادي الافريقي...

مقارنة ببقية النوادي الكبيرة في تونس ؟

النقطة الثانية : شكون واشنية أسباب فشل الرياحي في النادي الافريقي؟

النقطة الثالثة : مقارنة الرياحي ببقية رؤساء النوادي الكبيرة في تونس

******************************

ملاحظة 1 : المجال مفتوح لتعديل بعض النقاط ولإضافة ومناقشة نقاط أخرى.

ملاحظة 2 : حسب رايي النقاش في النقاط هاذي وتوضيحها مهم ومفيد للناس الكل .

ملاحظة 3 : اليوم ثما شكون يشتم ويسب في الرياحي

وثما شكون يتمنى الرياحي "يفلس"

وثما شكون يتمنى الرياحي يدخل "الحبس" بتهمة التحيل

وثما شكون يتمنى سيناريو آخر: المهم التخلص من الرياحي ...

العباد هاذم يتصورو ويحبو يقنعونا اللي الهدف الوحيد اليوم هو خروج الرياحي...

الهدف : خروج الرياحي سبب مشاكل النادي الافريقي...

4- عندي حوارات ومقالات صحفية تشخص وضع النادي الافريقي

بداية من 2003 لحدود 2010

باقي متردد ما نحبش ننشرها فقط احتراما وتقديرا للمرحوم بالامين ...

تشخص وضع النادي الافريقي مقارنة بكبار تونس

قبل كمال إيدير والظروف اللي تسلم فيها إيدير المسؤولية في 2005

وطريقة خروج كمال إيدير في 2010 .

[الصادق ساسي]

النقطة الاولى : شكون واشنية أسباب مشاكل النادي الافريقي ؟
**************

الواحد يتلفت يلقى النجم الساحلي عندو 9 ألقاب إفريقية

(1 رابطة الابطال/ 2 كأس الكؤوس/4 الكاف/ 2 سوبر )

وشارك في المسابقات الافريقية 27 مرة منها 23 مرة متتالية

وشارك في كاس العالم للأندية ...

يتلفت يلقى الترجي عندو 5 ألقاب افريقية

(2 رابطة الابطال/ 1 كاس الكؤوس/ 1كاف / 1 سوبر)

وشارك في المسابقات الافريقية 28 مرة

وشارك في كاس العالم للأندية...

الواحد يتلفت يلقى النادي الصفاقسي عندو 4 كؤوس كاف

وشارك في المسابقات الافريقية 13 مرة ...

الواحد يتلفت يلقى الترجي والنجم في ال3 الأوائل في افريقيا

ويلقى النادي الصفاقسي ترتيبو 10

في حين النادي الافريقي في المرتبة 30 ...

الواحد يتلفت في المشهد الرياضي

يلقى النوادي المذكورة مسيطرة على الهياكل الرياضية ولجان التحكيم في تونس وفي افريقيا

وعلى الصحافة بأنواعها ...

في حين النادي الافريقي موجود خارج المشهد الرياضي أصلا.

وقتها الواحد يتساءل شكون السبب ؟

واشنية الأسباب ؟

يبقى السؤال مطروح.

وفي الإجابة على السؤال هاذا نوصلو للحل .

ملاحظة : البعض يحب "يلصق" مشاكل النادي الافريقي في الرياحي ...

وقبل الرياحي حاولو يمسحوها في جمال العتروس ...

وقبل حاولو يبررو تقصيرهم وفشلهم بالعوامل الخارجية (شيبوب ...).

وفي الإطار هاذا المطلوب من المسؤولين السابقين للنادي الافريقي وعلى راسهم كمال إيدير

يفسرو للجماهير الأسباب الحقيقة لوضعية النادي الافريقي مقارنة بكبار تونس...

وينجم وقتها إيدير (وهاذا أقل واجب) يتكلم على العوامل الخارجية ...